Salceda presenta a humanización da rúa Dr. Zunzunegui

Mañán martes, día 14 de abril de 2009, ás 20:00 horas, presentaráse no auditorio do Concello de Salceda de Caselas o proxecto de humanización da Rúa Dr. Zunzunegui e o novo plan de tráfico. O Concello de Salceda vai executar en breve o proxecto de “Humanización da Rúa Dr. Zunzunegui”, primeiro obxetivo do plan de humanización que está a diseñar o goberno municipal para mellorar a calidade urbanistica da vila. Este proxecto está financiado pola Consellería de Innovación e Industria a través da convocatoria de subvención de mellora de zonas comerciais e polo própio Concello.Tamén se presentará o novo plan de tráfico e os novos aparcadoiros, que serán fundamentais para axilizar a circulación no centro urbán e estacionar os vehiculos co obxetivo de favorecer o comercio da vila.

Senda dos Humedais

Este pasado martes día presentouse en San Estevo de Budiño a Senda dos Humedais. Trátase dunha bonita ruta de sendeirismo, duns 9 kilómetros de percorrido, na que ademais se poden ler distintos paneis informativos que nos axudaran a enteder e a valorar máis, un dos tesoros medioambientais do que dispón a nosa bisbarra, que son os humedais das Gándaras de Budiño. Nós tivemos a ocasión de percorrelo estes días e a verdade e que é absolutamente recomendable. Cáseque na metade do percorrido parte outra ruta de sendeirismo que vai cara o Monte Aloia. Cruzando o río Louro neste punto e en apenas uns 100 metros chegamos a famosa Ponte das Febres, no Camiño de Santiago onde conta a lenda que enfermou de morte San Telmo e tivo que regresar a Tui onde falecería días máis tarde.
A ruta, para os que tedes GPS podédela baixar eiqui no wikiloc.
Nesta mesma páxina podedes baixar máis rutas subidas por Valdolouro da bisbarra e arredores.

Este é o álbum fotográfico que tomamos na Senda dos Humedais.

II Festa Trezecatorzedora

A Asociación Cultural Deportiva e Ecoloxista Trezecatorze de Salceda xa ten en marcha a segunda edición da Festa Trezecatorzeadora. Este é o seu cartel anunciador.

Reunións informativas sobre os Bancos de Tempo

Ahora que ca crise sobra máis tempo do normal, tes a posibilidade de invertilo nun banco que a bo seguro non dará en quebra. Trátase dos Bancos de Tempo que organiza o concello de Salceda de Caselas e na que os veciños poden invertir parte do seu tempo libre en axudar a outras persoas usando a súa experiencia ou habilidades para determinadas tarefas e a cambio outras persoas invertiran tamén o seu tempo en axudarche nesas tarefas que non eres capaz de realizar ti mesmo ou non tes a práctica suficiente. Se non o entendeches ben, non pasa nada porque este martes na Devesa o concello de Salceda organiza dúas reunións.

Ás 16:30 horas efectuarase a PRIMEIRA REUNIÓN DE USUARIOS/AS DE BANCO DE TEMPO, destinada as persoas rexistradas como usuarias de Banco de Tempo.E ós acompañantes que queiran levar.Os temas a tratar son:
-Desarrollo dun Banco de Tempo.
-Propostas para a realización de talleres.
-Remate coa degustación dun postre feito por unha usuaria.
A segunda é unha REUNIÓN INFORMATIVA ás 18:00 horas para todalas persoas interesadas en coñecer os Bancos de Tempo.

O BNG de Salceda pide o cumprimento efectivo de horarios ó persoal ao servizo do Concello

A Asemblea Local do BNG, reunida o sábado día 14 de marzo, entre outros asuntos avaliou o proceso seguido para a elaboración dos orzamentos para este ano 2009 e a súa aprobación polo Pleno do concello o pasado venres. En relación co capítulo de persoal, a Asemblea Local valorou que nunha situación de crise como a que se está a vivir é fundamental contar cun cadro de persoal efectivo, tanto funcionarios como laborais, que desenvolva a súa actividade diaria con eficiencia e clara vontade de servizo aos cidadáns, principais destinatarios dos servizos que o Concello lles debe prestar coa máxima calidade e en óptimas condicións. Neste contexto, o BNG de Salceda considera necesario mellorar a produtividade individual e de conxunto dos servizos. Un exercicio profesional e sen privilexios debe levar a que o persoal adscrito aos diversos servizos municipais sexa efectivo nas súas actividades diarias. Nesta liña o BNG pídelle ao Alcalde de Salceda que estableza o cumprimento efectivo do horario semanal, atendendo as previsións legais vixentes, é dicir, para o persoal funcionario 37 horas e ½ semanais, e 40 horas semanais para o persoal laboral. O BNG considera que as cidadás e os cidadáns de Salceda de Caselas deben percibir claramente que tanto o goberno municipal como persoal do Concello (tanto os funcionarios como o persoal laboral) cumpren co seu cometido no Concello e se esforzan por aportar todo o posible para sobrepoñerse a un momento de dificultade; e, dese xeito, apoiar a aqueles concidadáns que se ven inmersos en graves situacións, como poden ser afrontar dificultades económicas ou incluso a perda do emprego. Por último a Asemblea Local apoia o proceso de regularización iniciado polo Goberno Municipal, coa previsión orzamentaria de crear na plantilla de persoal unha praza de funcionario/a (Arquitecto/a),e duas de persoal laboral fixo (Técnica/co Local de Emprego, e Técnica/co de Información Xuvenil), cumprindo así o criterio de ir regularizando prazas empezando polas categorías mais altas.

A equipa de goberno de Salceda conxela os seus salarios por mor da crise

O Pleno do Concello de Salceda de Caselas aprobou inicialmente os Orzamentos presentados polo goberno municipal para o ano 2009 cos votos a favor do BNG e do PSOE e en contra do PP. Unha vez publicados no Boletín da Provincia estarán 15 días a exposición pública para posibles alegacións.
Estes orzamentos contemplan 5.500.000 € de ingresos e 5,177,000 € de gastos, o que supón un superavit de 330,000 €. O capítulo de inversións que ascende a 815,000 €, o que supón un incremento de 80.793,00€ con respeto ó 2008, contempla obras como a humanización da rúa Dr. Zunzunegui, a mellora da cuberta do pavillón de deportes, o remate do Concello Vello, o parque etnográfico dos muiños do Rio Caselas, entre outras. Estas inversións veranse complementadas polas contepladas no Fondo Estatal de Inversión Local (1,360,332€) e outros plans provinciais e autonómicos.
No apartado de persoal cabe salientar que se conxelan os salarios das adicacións exclusivas da equipa de goberno non incrementando o IPC como sería o normal nunha situación de bonanza. Por outro lado, neste apartado tamén é resaltable a creación de tres novas prazas no cadro de persoal: a de arquitecto municipal (funcionario), a de axente de desenvolvemento local (laboral fixo) e a de tecnico da OMIX (laboral fixo). O concelleiro Martín Iglesias aclara que vaise empezar a regularizar situacións laborais irregulares herdadas do anterior goberno e vaise comezar polas categorías máis altas.
Segundo, Marcos Besada “é momento de apretarse os cintos, de contención do gasto e unha mellora na xestión de cobro dos ingresos xa que a crise chega a tódolos sitios, incluidos ós concellos”
Tamén se aprobou a ordenanza reguladora do estacionamento de horario limitado (zona azul) que será gratuita e que busca a finalidade de crear prazas de aparcamento para xestións puntuais en certas rúas, “tal e como fixeron concellos veciños e que tan bó resultado está a dar” recalcou o alcalde.
Por último aprobouse o decálogo do viño de calidade en Galicia e unha moción que insta á Xunta de Galicia a cambiar o Regulamento do Xogo para regular dunha maneira máis concreta e adaptada á realidade do xogo do bingo “social” que realizan algunhas asociacións e comisións de festas sen ánimo de lucro.

5ª edición do Play-Doc en Tui

Hoxe mércores ás 8 da tarde dará comenzo a 5ª edición do Play-Doc en Tui. O festival prolongarase ata o domingo día 22. Aparte de documentais, charlas e música este ano terá lugar un seminario-obradoiro chamado O Retrato Filmado, no que un reducido grupo de realizadores levarán adiante unha serie de documentais de curta duración sobre distintas persoas de Tui que se prestaron voluntarias e que se proxectarán durante os días que dure o festival. Unha desas persoas e a avoa de Tui, a señora Palmira de Caldelas de 106 anos que será retratada pola realizadora tudense Diana Gonçalves. Máis información en Play-Doc.com e no álbum fotográfico do festival.

Novo equipo ciclista en Budiño

O pasado xoves día 5 presentouse oficialmente en Budiño (O Porriño) un novo equipo ciclista: Budiño Bike. Trátase dun grupo de xente cunha afección común, o ciclismo de montaña. Son arredor de 25 socios que pretenden desfrutar en conxunto deste deporte. Participando en marchas, facendo saídas en grupo e organizando distintas actividades. A súa primeira cita importante para este ano será a organización da VIII Marcha de BTT Faro de Budiño, prevista para o vindeiro 26 de Abril e que ata de agora organizaba o Clube Ciclista Spol de O Porriño.

A Coro Polifónico de Entenza gravará este ano o seu primeiro CD

A Coral Polifónica de Entenza gravará este ano o seu primeiro CD. Trátase dun traballo con 16 cancións que se gravará entre o 2 e o 3 de maio e que verá a súa luz alá pola metade do mes de xuño. Máis información na súa web oficial.

O Concello de Salceda asina o dereito de superficie para o novo depósito de augas para a vila

O Alcalde de Salceda de Caselas, Marcos Besada, e o Presidente da Comunidade de Montes de San Xurxo, Serafín Sanjuan Sanjuan, asinaron a cesión do dereito de superficie a 30 anos a favor do Concello para a construcción do novo depósito de augas para o abastecemento ó centro urbán.

O 22 de abril de 2004 aprobárase no Concello de Porriño a cesión de auga a Salceda procedente do Oitavén e que chegaba ata a parroaquia de Atios.. Pero non foi ata o ano 2008 cando houbo un compromiso da Xunta de Galicia para executar esta obra. Despois viñeron os trámites administrativos, entre os que se incluen os das Comunidades de Montes de San Xurxo e Parderrubias para o deslinde da zona, asambleas para a súa aprobación, etc, ademáis dos correspondentes ós Concellos de Porriño e Salceda e ós da Xunta de Galicia. Finalmente, con esta sinatura e a aprobación polo próximo pleno da cesión á Xunta de Galicia dos terreos, rematarán os citados trámites, co que este organismo xa pode licitar a obra para a súa posterior execución.
O orzamento total da obra ascende a 2.099.759,19 €, aportado nun 83,33% pola Xunta de Galicia e no 16,67% restante polos Concellos de Salceda de caselas e Porriño, correspondéndolle 200.030 € ao primeiro e 150.000 € ao segundo, a pagar en duas anualidades.
Trátase dun proxecto de vital importancia para Salceda, onde se vai construir un depósito de 3.000 metros cúbicos no lugar chamado Alto da Forca, así como o ramal de abastecemento aos depósitos municipais de San Xurxo.
Marcos Besada agradeceu a colaboración das Comunidades de Montes e a súa implicación no proxecto. “A construcción deste depósito vai server de base para a creación dunha verdadeira traida municipal, podendo dar servizo á parroquia de San Xurxo xa que hai un compromiso de conexión á súa traida”. “Mellorase e auméntase así a cobertura e calidade do abastecemento de augas, deixando de depender das traídas parroquiais, que durante tantos anos tiveron que loitar por conseguir este servizo básico.”