A directiva da mancomunidade de Montes de Salceda quere mostrar o seu malestar polo trato recibido pola Consellería de Medio Rural da Xunta de Galicia ante o plantón que protagonizaron dous técnicos comprometidos por esta para realizar unha charla informativa sobre a praga do nematodo do piñeiro.
O despropósito comezou xa coa tardanza en determinar pola Consellería das persoas encargadas da poñencia da citada charla. Estaba prevista inicialmente para o día 4 de marzo, pero ante falta de resposta da Consellería decidiuse trasladar para o día 11, xa que ata o día anterior non se confirmaron os técnicos encargados de explicala situación. Ante a falta de tempo para promocionar o acto decidiuse pospoñelo.
Despois de publicitalo acto para o venres 11 durante todas esa semana, o xoves 10 recíbese un fax onde se explica que os técnicos asignados non poden asistir por unha cuestión de axenda, xa que tiñan unha reunión en Santiago ese día ás 8 da noite, cousa sorprendente polo horario dos funcionarios. Nese mesmo fax informase que si se quere información sobre a praga ten que asistir unicamente a directiva da mancomunidade á Consellería para que logo esta lla comunique ós comuneiros e propietarios particulares, ós que ía dirixida a charla.
Ante este plantón, a Mancomunidade ponse en contacto coa Asociación Forestal de Galicia e esta lle proporciona un técnico que informa do “que sabe, pois a Consellería é moi opaca neste proceso e non ten as cousas claras nin lles aclara certas cuestións técnicas, importantes para as comunidades e propietarios particulares.”
A Mancomunidade de Montes pide que isto non volva a pasar e que a Consellería informe ós propietarios de montes con piñeiros dos seus dereitos e das súas obrigas dentro da área de restrición pola praga. Recorda tamén os ridículos 470 € que a Xunta lles otorgou como axuda para a prevención de incendios forestais o pasado ano.
No hay comentarios:
Publicar un comentario